أنقذوا عيون مرضي مستشفي الرمد Save Our Eyes

السلام عليكم و رحمة الله و بركاته يا شباب ....

أكيد كتير مننا حضر راوند الرمد في مستشفي الدمرداش ... و أكيد لاحظتوا قد ايه المرضي حالتهم المادية متساعدش أنهم يتعالجوا في مكان خاص ....
اللي أحب أقوله أن المرضي بيجيبوا مستلزمات العملية بنفسهم ( عدسات .. أدوية .. زيت ..الخ )
هما بيقدروا يجيبوا أنواع مش غالية و في نفس الوقت تقضي الغرض بس مش أحسن نتيجة طبعا لكن الحمد لله أحسن من مفيش أكيد ....

لكن زي مأنتوا عارفين في مشاكل بسيطة في الأجهزة ... يعني في اللي محتاج تصليح ... و اللي مش موجود ...

طيب احنا ممكن نعمل ايه ؟؟ لأ ممكن نعمل كتير و ايد لوحدها متسقفش

بصراحة احنا الحمد لله بقالنا شهر في الموضوع ده .. لأننا كنا بنظبط الأمور مع دكاترة الرمد ربنا يكرمهم و بصراحة التعاون منهم كبير و مرحبين بينا أوي ....

و الشغل ان شاء الله مع الأساتذة الكبار و المدرسين و النياب علشان نضمن ان المساعده هتوصل لمستحقيها ان شاء الله ... يعني الحمد لله ربنا يقدرنا و نقدر نساعد الفقراء ....

طيب في شقين في الموضوع ... المساعدة المادية و المؤازرة النفسية :

أولا ماديا :

1) أول جهاز حطينا عنينا عليه هو جهاز التنفس الصناعي للأطفال ( ventilator) ... فعلا محتاجينه لأن في عمليات متأخرة و مش عارفين تتعمل للأطفال .. و أكيد عارفين خطورة الموقف ده اللي ممكن يؤدي لفقدان البصر ... فققررنا أن احنا نسأل في الشركات و يا رب نقدر نجيب تخفيض علشان نشتري واحد بمبالغ التبرعات ... و ممكن يا جماعة لو في حد يعرف يساعدنا في الموضوع ده يبعتلي محتاجين فعلا مساعدة فيه .... لأنقاذ عيون الصغار

2) في كمان عدسة للتشخيص 20 D محتاجينها و هي مش غالية أوي فبفكر نبدأ بيها ان شاء الله ....

3) شرائط لجهاز قياس السكر في الدم ... الجهاز موجود لكن الشرائط فيها عجز و برده سعرها مش غالي أوي ممكن بمجهود بسيط نوفره ان شاء الله ...

في حاجة يا جماعة ... أن لو قدرنا نجيب جهاز ان شاء الله ... ده ممكن يكون صدقة جارية علي روح المتوفين ... في ناس قالولي كده عايزين نتأكد لو كده تبقي فكرة جامدة جدا ... علشان لو حد عايز يعمل كده فحتكون فرصة جميلة أوي أن الصدقة ننقذ بيها عيون ملايين الأطفال

في حاجات كتير أوي زي أدويه نفسنا يكون عندنا صندوق دائم ليها علشان لو حد مش قادر يجبها نساعده بعد التأكد من أحقيته ...


ثانيا : نفسيا و صحيا

و الموضوع ان شاء الله حنبتديه في أجازة الصيف ان يكون في متطوعين يعملوا توعية صحية للمرضي و يسألوا عليهم و يحاولوا يحلوا مشاكلهم ... طبعا حيكون تحت اشراف الدكاترة

و مش هقولكوا كمية السعادة اللي حتعود عليكوا و لا الدعوات لازم تجربوها ... كفاية أنكوا تكونوا سبب في ابتسامتهم


ثالثا : تكملة الحلم ... في أهداف كتير بس نبتدي الأول ان شاء الله و يا رب نقدر نعمل حاجة


المهم الحلم كبير ... و ان شاء الله ممكن يتحقق بمساعداتكم و حبكم للخير ...
أحب أسمع رأيكوا و اقترحاتكوا .... و يا ريت لو حد يقدر يساعدنا معنويا أو ماديا حيكون أكبر شرف لينا ان شاء الله ... بجد ابتسامه أو جنيه ... هيفرقوا كتيير أوي و يساووا دعوات ناس غلابة نتمني ان نكون سبب في فك كربهم بعد ربنا ان شاء الله

موقع الجروب على الفيس بووك
_